70 ஆண்டு சுதந்திரத்தில், இந்தியா கண்ட சிறந்த கார்கள்!
Posted Date : 20:09 (08/09/2017)Last updated : 20:09 (08/09/2017)


இந்தியா சுதந்திரம் பெற்று, 70 ஆண்டுகள் நிறைவடைந்துவிட்டது! இந்த 70 ஆண்டுகளில், குடியரசு நாடான இந்தியாவில், ஒவ்வொரு இந்தியரும் பெருமைப்படும் வகையில் பலவற்றை சாதித்திருக்கிறோம். இந்த இடைப்பட்ட காலத்தில், இந்தியாவின் வரலாற்றுப் பக்கங்களில் தவிர்க்க முடியாத பைக்குகளைத் தொடர்ந்து, கார்களை இப்போது பார்ப்போம்.

 
ஹிந்துஸ்தான் அம்பாஸடர்:

இந்திய சாலைகளில் தனிக்காட்டு ராஜாவாக, ஒருகாலத்தில் கெத்தாக வலம் வந்த கார்தான் அம்பாஸடர். இங்கிலாந்தைச் சேர்ந்த மோரிஸ் மோட்டார்ஸ் லிமிடெட் எனும் நிறுவனம் தயாரிப்பான Oxford Series III எனும் காரை அடிப்படையாகக் கொண்டு தயாரிக்கப்பட்ட கார்தான், Amby எனச் செல்லமாக அழைக்கப்படும் அம்பாஸடர். இந்தியாவில் இந்த கார் 1957-ல் அறிமுகமானபோது, இதன் விலை 16 ஆயிரம் ரூபாய்! இதன் உற்பத்தி 2014-ல் நிறுத்தப்பட்ட போது, 5.25 லட்ச ரூபாய்க்கு விற்பனை செய்யப்பட்டது.
 
 
 
 
அதிகப்படியான இடவசதி, உறுதியான கட்டுமானம், சொகுசான ஓட்டுதல் ஆகியவற்றைக் கொண்டிருந்ததால், இந்தியாவின் கூட்டுக் குடும்பங்கள் மட்டுமல்லாது, மத்திய அரசின் சாய்ஸாகவும் இருந்தது அம்பாஸடர். அரசாங்க அதிகாரிகளும் இதனை விரும்பிப் பயன்படுத்தியதால், இந்த காரின் விற்பனை எண்ணிக்கையில் 16 சதவிகிதம், அரசு சார்பாகவே இருந்திருக்கிறது. இன்றும்கூட சில அரசியல்வாதிகள் மற்றும் அரசு அதிகாரிகள், இந்த காரில் பயணிப்பதைப் பார்க்கலாம். கார் ஆர்வலர்கள் தவிர்க்க முடியாத தயாரிப்பாக இருந்த அம்பாஸடரின் தயாரிப்பு, 2014-ல் முடிவுக்கு வந்தது. இதனுடன், அந்த நிறுவனமும் மூடுவிழா கண்டு விட்டது. 

 
பிரிமியர் பத்மினி:

அம்பாஸடர் காருக்கு கடும் போட்டியை ஏற்படுத்திய கார், பிரிமியர் பத்மினி. ஃபியட் 1100 Delight காரின் மறுஆக்கமாகப் பார்க்கப்படும் இந்த கார், இந்தியாவில் 1973 முதல் 1996 வரை தயாரித்து விற்பனை செய்யப்பட்டது. ''அம்பாஸடர் பெரிதாக இருக்கிறது. எனக்கு காம்பேக்ட்டாக ஒரு கார் வேண்டும்'' என்பவர்களுக்கான சாய்ஸாக இருந்த பத்மினி, நாளடைவில் மும்பையின் அடையாளங்களுள் ஒன்றாக மாறியது.
 
 
 
 
அங்கே 'Kaali Peeli' டாக்ஸி எனச் செல்லமாக அழைக்கப்படும் இந்த கார், இந்தியாவின் வரலாற்றுப் பக்கங்களில் தவிர்க்க முடியாத ஒன்றாக விளங்குகிறது. கடுமையான மாசு கட்டுப்பாடு விதிகள் புழக்கத்தில் இருந்தாலும், இன்றும் கூட மும்பையில் பத்மினி கார்கள், டாக்ஸிகளாகப் பயன்பாட்டில் இருப்பதே, அதன் அழியாப் புகழுக்குச் சாட்சி. ஆனால் இத்தகைய நிலையை, இந்த நிறுவனத்தின் அடுத்தடுத்த மாடல்கள் (பிரிமியர் ரியோ) பெறாததுதான் சோதனை. 

 
மாருதி 800:

இந்தியாவின் மிகப்பெரிய ஆட்டோமொபைல் புரட்சியை ஏற்படுத்திய பெருமை, இந்த காரையே சேரும். குறைவான விலை & பராமரிப்புச் செலவுகள், எளிதான ஓட்டுதல், அதிக மைலேஜ் என காரை ஆடம்பரப் பொருளாகப் பார்த்து வளர்ந்தவர்களை, கார் உரிமையாளராக மாற்றியது மாருதி 800தான். 1983 முதல் 2014 வரை விற்பனை செய்யப்பட்ட இந்த கார், இந்தியாவில் நீண்ட நாட்கள் உற்பத்தியில் இருந்த கார் என்ற பெருமையை, நீண்ட நாட்களாகத் தக்கவைத்திருந்தது.
 
 
 
 
இந்த இடைப்பட்ட காலத்தில், சுமார் 29.50 லட்சம் கார்கள் விற்பனையாகின என்பது குறிப்பிடத்தக்கது. தற்போது இந்த வியத்தகு சாதனையை, மாருதியின் மற்றொரு தயாரிப்பான ஆல்ட்டோ பெற்றுவிட்டது. சுருக்கமாகச் சொல்வதென்றால், கார் விற்பனையில் மாருதி 800 கொடுத்த அதிரடியான துவக்கத்தை அடித்தளமாகக் கொண்டு, இந்தியாவில் தனது பாதையைச் சரியாக நிர்ணயித்த மாருதி சுஸூகி, இன்றைக்கு மாதத்துக்குச் சராசரியாக 1.4 லட்சம் கார்களை நம் நாட்டில் விற்பனை செய்து கொண்டிருக்கிறது!

 
டாடா நானோ:
 
''இந்தியா மட்டுமல்லாது, உலகத்திலேயே விலை குறைவான காரை தயாரிப்போம்'' என்ற ரத்தன் டாடா கண்ட கனவின் வெளிப்பாடாக வந்ததுதான் நானோ. இது 2009-ல் விற்பனைக்கு வந்தபோது கிடைத்த அசுரத்தனமான வரவேற்பு, நாளடைவில் கானல் நீராகப் பொய்த்துப் போனது. இது இன்றுவரை, இந்திய ஆட்டோமொபைல் துறை கண்ட மிகப்பெரிய முரணாகப் பார்க்கப்படுகிறது. ஏனெனில் ''உலகின் விலை குறைவான காரை வைத்திருப்பவர்'' என்ற அடையாளப்படுத்திக் கொள்ள, பலர் விரும்பவில்லை என்பதே நிதர்சனம். இத்தனைக்கும் அப்போது விலை குறைவான காராக அறியப்பட்ட மாருதி 800 காருடன் ஒப்பிடும்போது,
 
 
 
 
மாடர்ன் டிசைன் - அதிக இடவசதி - அதிக மைலேஜ் - அதிக வசதிகள் எனப் பல பிளஸ்களை இந்தக் கார் பெற்றிருந்தது கவனிக்கத்தக்கது. இதன் விற்பனையை அதிகரிக்கும் பொருட்டு, பல ஸ்பெஷல் எடிஷன்கள், பவர் ஸ்டீயரிங், திறக்கக்கூடிய பூட், CNG கிட், AMT ஆட்டோமேட்டிக் கியர்பாக்ஸ் எனக் காலத்துக்கு ஏற்ப மாற்றங்களைக் காரில் டாடா செய்தாலும், அது நானோவின் விற்பனையில் பெரிய தாக்கத்தை ஏற்படுத்தவில்லை. தற்போது எலெக்ட்ரிக் நானோ காரைத் தயாரிக்கும் எண்ணத்தில் இருக்கிறது டாடா. 

 
ஹூண்டாய் சான்ட்ரோ:

1997-ல் ஹூண்டாய் நிறுவனம், உலக கார் சந்தைகளில் Atos எனும் ஹேட்ச்பேக்கை அறிமுகப்படுத்தியது. இது அங்கே பெற்ற வளர்ச்சியைக் கருத்தில் கொண்டு, இந்தியாவில் அதே காரை சான்ட்ரோ என்ற பெயரில், 1998-ல் இந்நிறுவனம் அறிமுகப்படுத்தியது. மாருதி கார்களுக்குப் போட்டியாகக் களம் கண்ட இந்த கார், தென் கொரிய நிறுவனமான ஹூண்டாயை, இந்திய மக்களின் மனதில் இடம்பெறச் செய்தது என்றால் அது மிகையில்லை. இதற்கு அந்த காரின் விலை, சிறப்பம்சங்கள், இடவசதி, நல்ல மைலேஜ், குறைவான பராமரிப்புச் செலவுகள் ஆகியவையே காரணம்.
 
 
 
 
தற்போது மும்பையில் பத்மினி காருக்கு அடுத்தபடியாக, சான்ட்ரோதான் மக்களால் விரும்பப்படும் டாக்ஸியாக இருக்கிறது. அந்தளவுக்குப் புகழைப் பெற்றிருக்கும் இந்த கார், இந்தியாவில் 16 ஆண்டுகள் தயாரிப்பில் இருந்தது. 2014-ல் இதன் உற்பத்தியை நிறுத்திய ஹூண்டாய், இதற்கு மாற்றாக இயான் காரை இந்த நிறுவனம் வழிமொழிந்தது. ஆனால் சான்ட்ரோவுக்குக் கிடைத்த நன்மதிப்பு, ஏனோ இயானுக்குக் கிடைக்கப் பெறவில்லை. எனவே சான்ட்ரோ பெயரிலேயே, ஒரு புதிய காரைக் களமிறக்கும் முடிவில் உள்ளது ஹூண்டாய்.  
 
 
- ராகுல் சிவகுரு.